Bible

1 後來，大衛又攻擊非利士人，打贏佢等，結束佢等在這垤土地个統治。 2 佢又打贏摩押人。佢喊佢等睡在地上，用一條索仔量佢等，將頭兩擺量到个人㓾死，第三擺量到个人就留佢等个命。所以摩押人歸順大衛，向佢進貢。 3 大衛又打贏瑣巴王利合个孻仔哈大底謝。當哈大底謝向幼發拉底河地區進軍、愛恢復佢个統治个時， 4 大衛捉到佢个騎兵一千七百人，步兵兩萬人。對捉來个馬當中，大衛留下愛拖一百輛戰車罅額个戰馬，將其他戰馬个腳筋全部剁斷。 5 大馬士革个敘利亞人派軍隊去幫助瑣巴王哈大底謝个時，大衛攻打佢等，㓾掉兩萬兩千人。 6 然後，大衛派軍隊駐在大馬士革、敘利亞人个國內；佢等全部歸順大衛，向佢進貢。大衛無論去到㖠位，上主使佢逐擺打贏。 7 大衛搶到哈大底謝該兜軍官所拿个金盾牌，帶轉耶路撒冷去， 8 又對哈大底謝統治个兩隻城市比他㧯比羅他搶到盡多个銅。 9 哈馬王陀以聽講大衛打贏哈大底謝个全軍， 10 就派佢个孻仔約蘭去向大衛王請安，祝賀佢得到勝利(原來陀以㧯哈大底謝時常相㓾)。約蘭帶來金、銀、銅製造个禮物送給大衛， 13 大衛在鹽谷㓾掉一萬八千以東人，轉來以後就得到當大个名聲。 14 佢派軍隊駐在以東个逐地方；該地方个人民全部歸順佢。大衛無論去到㖠位，上主使佢逐擺打贏。 15 大衛統治全以色列，向人民實行公義。 16 洗璐雅个孻仔約押做元帥；亞希律个孻仔約沙法做歷史官； 17 亞希突个孻仔撒督㧯亞比亞他个孻仔亞希米勒做祭司；西萊雅做王室書記； 18 耶何耶大个孻仔比拿雅做大衛个侍衛長、統管基利提人㧯比利提人；大衛該兜孻仔全部做祭司。